【水晶的穿搭法則】


呢幾年,戴水晶嘅女仔成條街都係。大家都好似想依賴喺水晶嘅魔力,寄望水晶可以為啱啱開始嘅2022年帶黎好運。戴水晶嘅原因有好多,可以係為咗功效,旺下桃花、辟下邪,可以係純粹鍾意佢嘅顏色,甚至可以將佢當成Accessories襯衫。咁究竟水晶點樣可以影響到一個人嘅衣著習慣呢?



Pippy

@_p25i_


「梗係功效啦!」

Pippy十分相信水晶嘅功效,甚至認為水晶係佢嘅精神寄託。因為佢嘅水晶Size偏細粒,即使顏色比較鮮豔,都唔會擔心對Outfit整體感覺有太大影響。反而可以利用水晶嘅顏色搭配其他首飾去襯衫,令Outfit睇落冇咁單一。



Venus

@wsy.venus_


「我揀功效!」

Venus深信水晶可以帶嚟好運。佢嘅水晶大部分都係偏細粒,因為比較適合自己手腕Size之餘容易襯衫。顏色方面,佢試過因為當日嘅Outfit偏歐美風而放棄戴粉紅色水晶。桃花還桃花,有時都要扮吓靚嘅!


Soso

@susyeesoso


「要靚!」

Soso係因為見到朋友戴,所以先好奇想玩下。佢抱著「寧可信其有」嘅心態戴水晶,覺得既然可以帶嚟好運,又可以襯衫,就唔爭在買多幾條試試。由於屋企嘅水晶沉色為主,唔會太Sharp,所以唔覺得水晶對Outfit有太大影響。


Sinman

@siiinman


「依然會揀功效!」

Sinman比較特殊,原來佢戴緊嘅唔係水晶!原來佢曾經戴過粉晶,但吸返嚟嘅全部都係爛桃花!從此以後,佢就放低咗對水晶嘅愛。佢係因為真係好鍾意圓狀珠珠簡單嘅外表,覺得好百搭,所以即使唔係水晶,佢都依然堅持買珠珠手鍊。