【眼鏡開場白】

眼鏡對於近視嘅人可以話係不可或缺,但係一個唔小心就會做咗「薯仔 」。眼鏡作為Fashion item之一,唔同形狀、款式不但會影響成個Look,更會影響人哋對你嘅第一印象,有如見面開場白一樣。而唔同人對眼鏡必定會有各自嘅執著,要配合面型之餘仲要襯返個人造型,睇下唔同人會點樣拿捏當中嘅平衝去展現自己嘅特點。




CoCo @laha_testing123


CoCo主要以「一副眼鏡走天涯」,所以配眼鏡時都諗過度過。而配透明眼鏡嘅原因大概係:「想畀人感覺特別少少!以前嘅眼鏡比較大眾款啲,但透明鏡框有種若有若無嘅低調,令人睇到自己冇戴眼鏡嘅樣咁。」同時Coco選擇呢副眼鏡希望畀人感覺成熟啲,冇咁細個。佢坦言自己副眼鏡都屬於平價款式,認為唔一定貴先有Fashion感覺。



Kahim @iamkahim


戴住透明眼鏡嘅Kahim令佢即使一身全黑打扮喺人羣中都特別顯眼,而有幾副眼鏡嘅佢會視乎當日嘅Outfit決定襯邊一副眼鏡。戴眼鏡喺Kahim眼中不但因為要處理深近視,更係Fashion item之一。同時佢會想展現一個較友善嘅形象:「平易近人啲,唔會咁惡,襯返我個樣。」如果要講想嘗試嘅款式,佢就話會係一啲特別啲嘅形狀,例如:星形、三角形。



Him @lthhim


Him戴緊嘅眼鏡係幾年前讀大學嘅時候買,嗰時興呢種比較文青嘅款式。佢坦言只係喺屋企附近眼鏡鋪配:「嗰啲眼鏡鋪會有一啲平時比較潮啲嘅眼鏡鋪冇嘅款,而出到嚟效果都幾好,啲人會讚幾靚同埋問邊到買,應該以為係貴嘢。」而Him表示最近會想配返一副簡單啲嘅黑色粗框眼鏡,好似又有另一種Style。