【細袋黑洞】|個袋咁細裝到啲咩呀!?


細袋近年大行其道,各大時尚品牌都推出不同類型細袋,甚至愈出愈迷你,到處都係細袋蹤影。女生手袋從來好似叮噹「百寶袋」一樣,小至搓手液、Handcream,大至縮骨遮甚至暖水壺,多多都拎得出嚟。到底細袋對女生有咩吸引力?佢哋們將幾多嘢放入呢個迷你黑洞?一齊窺探下What’s in her mini bag!



April // Magazine marketing @apr_ily


April從事雜誌Marketing部門,所以十分留意On trend item,眼見唔同Fashion brand都接連推出細袋,April當然都唔執輸。曾被朋友質疑細袋好睇唔好用,佢笑言:「裝到唇膏、鎖匙同張卡就得啦!」雖然April信奉「最緊要靚」嘅宗旨,但亦只會喺簡單行下街食個飯嘅日子先會用細袋。細問之下得知April家中擁有幾個細袋,甚至身上的呢個都未算最細:「仲有個再啲嘅細袋,連Cardholder 都裝唔到,就會直接放卡就算~」為咗用細袋,April會選擇較多袋嘅衫褲配襯,唔洗一抽二褦~




Toby // Sales @tobyyws


Toby會以實用性作為先決條件,平時佢較多孭大袋,而星期六日出街食個飯襯衫才會用細袋。

細袋對Toby來說,不但襯衫方便,更可以直接裝錢:「拍8達通都Ok,唔使煩!」身型細小嘅佢笑說,會因為自己細粒而多用細袋來平衡一下,所以屋企都有兩三個方便襯衫。問到細袋有限空間下嘅必備Item,Toby就話:「錢!最緊要帶錢出街!」Toby甚至為咗配合細袋,捨棄銀包轉用Cardholder。



Angel // Fashion editor @angelfong


Angel相信,細袋可以令整套Outfit昇華,畀人整體更精緻嘅感覺。雖然個袋看似好細,但Angel認為其實都足以裝到好多嘢~ Angel會根據場合而決定用大袋定細袋:「襯衫既話靚行先,做嘢可能就實用性行先。不過返工都冇咩好帶,所以有時都會帶細袋。」而今日Angel用細袋之餘,仲加上一個可斜孭嘅銀包,不但可以騰出細袋空間,更加為Outfit畫龍點晴!