【Fresh Morning 的前奏】

新一年,新開始!2022嘅願望就係可以早睡早起,朝頭早偷少少時間畀自己慢慢準備出門口。不論係起身發呆,煮早餐,定做運動,嗰股晨氣就係可以令個人醒神啲。今次嘅Playlist就係為早起嘅你度身訂造,希望大家能夠以輕鬆嘅心情展開新嘅一日。





New Day - Bearwear

緩緩輕快旋律好適合朝早聽住嚟Get ready,低沉偏Soft嘅男聲就算一朝早聽都唔會好刺耳。好似歌詞咁用首歌做"Soundtrack for our new day”幫自己打打氣啦~


春 - MIZ

因為旋律簡單,歌詞都簡單,所以我會用「乾淨」嚟形容呢首歌。佢畀人一種清爽嘅感覺,好似清晨去咗郊遊咁。


Daddy Blue - Brad stank

呢首歌輕快得嚟唔會太跳,起身呆呆哋嘅時候聽就最適合。旋律會不自覺咁帶返你個靈魂返地面,醒神得嚟唔會太嘈。


Hum! - maco marets

喺Spotify度被呢首歌嘅封面(張相係個好似好好食嘅早餐!)吸引住,原來連MV都係整緊早餐~雖然係Rap但十分易入口,晨早流流聽住嚟食早餐,個人都會變得輕快想跟住個Beat UN UN下!


killer tune kills me - KIRINJI, YonYon

呢首歌係由Kirinji嘅吉他手弓木英梨乃難得地擔任主唱,而出生喺首爾、東京長大嘅歌手YonYon就負責日韓嘅Rap部分,曲調充滿著濃濃嘅少女氣息,朝早聽到個人都Care free啲!


一樣 - 張蔓姿

「今天 昨天 明天~一樣~」,呢首歌旋律輕快歌詞琅琅上口,感覺好似聽住一個女仔無拘無束放飛自我一樣,朝早聽到會令心情好舒暢,MV仲大玩顏色對比嘅元素,聽覺同視覺上都有另一種療癒!