【Tone on tone內心戲】



顏色可以反映一個人嘅性格,撞色Outfit固然Eyecatching,但有時喺街上見到Tone on tone嘅人都會忍唔住望多幾眼,好似佢哋都會有低調嘅執著。同色系穿搭看似毫不費力地易襯,但要襯得好睇,布料嘅選擇、顏色深淺度、營造層次感嘅方法都十分講究,箇中學問一言難盡。一眾鍾情同色系嘅人,又會選擇用咩顏色,襯托屬於自己嘅個性?





Vicky

@vickyswcccc


黑色對於Vicky嚟講係沉實易襯嘅代表顏色,雖然佢覺得自己性格一啲都唔沉實,但黑色會令佢舒服自在啲。著同色系時,Vicky會選擇唔同材質的Item作為搭配重點,更會利用同Tone飾物去突出Outfit,例如黑色會襯銀色飾物。「平時冇乜人會發現你Tone on tone點襯衫,但其實細節位但會睇得出你係有用力打扮過。」可以話係個人、低調嘅「Fashion Show」。



Liz

@lizzyeung


綠色喺Liz眼中是舒服、Calm,而佢認為呢個特點同自己個性相近。對於同色系穿搭法則,Liz有獨特見解:「通常會用鮮色啲嘅Item做Main先,再用啲相近顏色嘅Item做配搭,去營造返個層次感。」佢坦言雖然每日都會用心打扮,但總會有想「Hea啲」嘅心情。Liz認為Tone on tone style較容易襯衫,而且畀人感覺係有用心襯。



Manson

@mansonleung_


Manson比較鍾意簡約Style,又因為覺得自己性格Carry唔到一啲好Sharp嘅顏色,所以都多著Earth tone衣服。對Manson而言,Tone on Tone係低調得嚟又話到畀人知有襯衫,亦展現到自己個性。而佢著同色系時通常會用另一隻色嘅Accessories去Highlight套衫。好似今日咁,佢就襯返黑色斜咩袋、襪同鞋去凝聚返個焦點,避免睇落太平平無奇。另外Manson都會用唔同布料去襯:「可以有返少少Contrast ,雖然遠睇看似冇乜分別,但近睇就會見到Details。」